Ginpahayag sang presidente sang Bacolod Alliance of Commuters, Operators and Drivers (BACOD) nga nangin madinalag-on ang ginpatigayon nga rally protest kag transport strike kahapon.
Sa interview sang Bombo Radyo Bacolod kay Rudy Catedral, may tatlo sila ka area kun sa diin ginpatigayon ang rally protest sa Bata flyover, Magsaysay flyover kag Bacolod City Public Plaza.
Suno diri, alas-6:00 sang aga sila kahapon nag-umpisa tubtob alas-3:00 sang hapon lamang bisan ang ila permit ang tubtob alas-10:00 sang gab-i.
Nakita sini nga dako ang nangin epekto sang ila transport strike bangod naggutok ang mga pasahero nga nabudlayan sa pagsakay.
Samtang, may lauman naman nga untat-byahe sini nga bulan nga suno kay Catedral may dako gid nga epekto sa mga commuters bangod may tatlo sila ka adlaw nga transport strike sa pagbukas sang klase.
