Naglibot sa ciudad sang Bacolod si Mayor Elect Greg Gasataya agud lantawon ang sitwasyon sang mga areas nga naga-eksperyensya sang pagbaha sa tion nga magbubo ang ulan.
Sa interview sang Bombo Radyo kay Gasataya, nakig-angot na ini sa Department of Public Works and Highways (DPWH) para mag-inspect sa pila ka area brgy.
Suno diri, may pagbaha nga naeksperyensyahan sa Brgy Mandalagan, sa Buri road, sa Country Homes kag iban pa.
Sa paglibot- libot sini nakita niya nga may iban nga ginharangan ang pagsulod sang tubig sa ila property amo nga nag-awas ang tubig sa dalan samtang may yara man sang iban nga gamay lang ang gina-iligan sang tubig.
Isa sa ginalantaw nga solusyon ni Gasataya amo ang pagpatigayon sang dredging sa mga suba bangod bisan ano pa ka dugang sang drainage basta indi man sa gihapon makagwa ang tubig.
Pahayag sini mapatigayon ini sang pagpakighon-anon kaupod ang DPWH kag City Engineers Office agud hatagan sang nagaka-igo nga tikang ang problema sa baha sa ciudad.
