Pagarespetuhon sang Israel ang ceasefire kun ini ang pagahimuon sang Iran.
Suno kay Israeli minister of defense Israel Katz, nakighinun-anon ini sa iya US counterpart nga si Pete Hegseth agud pasalamatan ang Amerika sa maisog nga desisyon ni US President Donald Trump nga maghimo sang tikang kaupod ang Israel batok sa Iranian nuclear threat.
Sa post ni Katz sa X, ginpahayag sini nga pagarespetuhon sini ang ceasefire basta ini ang pagahimuon man sang pihak nga bahin.
Antes ini, ginpahayag man ni Iranian president Masoud Pezeshkian nga ila pagarespetuhon ang ceasefire nga gin-anunsyar ni Trump kun ang Israel ang ang magasunod man diri.
Samtang, ginpahayag naman ni Bombo International News Correspondent Geraldine Gonzaga direkta sa Jerusalem, Israel nga malinong ang sitwasyon sa karun sa pungsod.
Suno kay Gonzaga, alas 7:00 sang aga oras sa Israel ulihi nga nagpalupad sang missiles ang Iran kag ulihi man sila nga nakabaton sang alert.
Humalin sadto, malinong na ang sitwasyon.
Nagpahayag naman ang gobyerno sang Israel nga indi naman sila magbalos agud mapabilin ang ceasefire.
Nagalaom ini nga mangin permanente na ang ceasefire agud nga matapos na ang gyera sa tunga sang duha ka pungsod.
Nagapati naman si Bombo International News Correspondent Elvie Pregua direkta sa Tel Aviv, Israel nga temporaryo lamang ang ceasefire kag magabalik man gilayon sa pagbayluhanay sang pag-atake ang duha ka pungsod.
Suno kay Pregua, madugay na ang gyera sang Israel kag Iran kag nagapati ini nga indi pa ini matapos sa karun.
Apisar sini, wala ini sa gihapon sang plano nga magpauli sa Pilipinas.
Padayon ang ila pagbantay kag pagmonitor sang sitwasyon sa karun sa Israel.
