Nasapwan ang patay nga fetus sa sulod sang karton sang sapatos sa suba sa Purok Kaburihan Economic Highway Barangay Estefania, Bacolod City, kaina alas- 9:00 sang aga.
Sa interview sang Bombo Radyo kay Raquel Retome, kaupod sini ang iya bana agud maligo kun tani sang may nakit-an sila nga nagalutaw nga karton.
Ila ini ginpalapitan kag ginlantaw ang unod.
Sa sulod may plastic nga itom kag sa sulod sini may plastic nga puti kun sa diin ginputos ang fetus nga babayi.
Suno kay Raquel, yara pa ang umbilical cord sang fetus kag kaangay nga preska pa ang dugo.
Ginabanta naman nga anum tubtob pito ka bulan na ang edad sang bata nga nagabarikutot sang nakit-an.
Suno naman kay Jose Retome, bana ni Raquel ginhingagaw nila kuha ang karton sa pagpati nga patay nga sapat ang unod kag ginakahangaw-an nga manimaho apang ila ginkakibot nga fetus ang unod.
Suno diri, gilayon sila nga nagtawag sa ila bata nga Barangay Tanod agud ipahibalo ang ila nasapwan.
Gindala ang fetus sa Triumph of the Holy Cross Parish kun sa diin ginbedisyohan ini ni Rev Fr Chris Gonzales antes ginlubong sa Burgos Public Cemetery.
