Subong nga Sabado, kadam-an sa mga Bacolodnon partikular na sa northern part sang ciudad ang ginpukaw sang baha.
Iban sa mga pumuluyo ang wala na napukaw, bangod wala gid makatulog umpisa sang magsaka ang tubig bangod sa tayuyon nga pag-ulan halin alas-10:00 sang gab-i tubtob alas-3:00 sang kaagahon.
Apang ano bala ang nagtuga sini?
Ang mabaskog nga mga pag-ulan nga nagtuga sang mga pagbaha sa Bacolod City ang bangod sa nagbasakog pa nga Southwest Monsoon ukon Hangin Habagat.
Una na nga nagpagwa sang heavy rainfall warning sa Silay City, Talisay City, Bacolod City kag EB Magalona.
Sa atun latest satellite animation, ang Habagat ang makatuga sang moderate to heavy rains ukon kasarangan tubtob sa mabaskog nga mga pag-ulan sa Western Visayas, Negros Island Region, Cavite, Batangas, Palawan kag Occidental Mindoro.
Lapta-lapta naman ang mga pag-ulan nga mabatyagan sa Metro Manila, Mindanao, Central Luzon, Bicol Region, Pangasinan, nabilin nga bahin sang Visayas, CALABARZON kag MIMAROPA.
Samtang mangin makanay na ang panahon sa nabilin nga bahin sang Luzon, apang yara gihapon ang posibilidad sang gulpyada kag makadali nga mga pag-ulan.
Kabahin sa nakapabaskog sa Habagat amo ang Bagyo sa East Northeast sang Extreme Northern Luzon sa gwa sang Philippine Area of Responsibility.
Alas-2:00 sang kaagahon, ang anay Tropical Depression ang nagsanyog na sa Tropical Storm.
Ini ang ulihi nga nasiplatan sa 1,925 km East Northeast sang Extreme Northern Luzon.
Dala sini ang kabaskugon sang hangin nga nagadangat sa 65 km/h kag pagmadlos nga tubtob 80 km/h.
Ang bagyo ang mahinay nga nagahulag sa West Northwestward nga dereksyon palayo sa Pilipinas.
