Nagsanyog pa sa Severe Tropical Storm category ang Bagyo EMONG samtang napabilin naman ang kabaskugon sang Tropical Storm DANTE.
Sa latest satellite monitoring, ang sentro sang Bagyo EMONG ang ulihi nga nasiplatan sa 245 km sa nakatungdan sang Bacnotan, La Union.
Dala sini ang kabaskugon sang hangin nga nagadangat sa 110 km/h kag pagmadlos nga tubtob 135 km/h, samtang ini ang nagahulag sa Southwestward nga dereksyon sa kadasigon nga 25 km/h.
Sa masunod nga 24 oras, ginalantaw nga magalubag ang hulag sang Bagyo sa southeastward tubtob sa north northeastward.
Ini ang ginalantaw nga magapalapit sa Pangasinan karun sa hapon kag mahimo maglandfall sa Ilocos Region karun sa gab-i ukon bwas sa kaagahon.
Tabukon sini ang Northern Luzon, kag magalusot sa Luzon Strait kag mahimo maglabay malapit sa Babuyan Islands.
Wala ginadula ang posibilidad nga antes maglandfall, ini ang magabaskog pa sa Typhoon category.
Ginpaidalom na sa Tropical Cyclone Wind Signal no. 3 ang naaminhan nga bahin sang Pangasinan kasubong man ang nakatungdan nga bahin sang La Union.
Signal No. 2 naman sa Ilocos Norte, Ilocos Sur, nabilin nga bahin sang La Union,nakatungdan nga bahin sang Apayao, Abra, Kalinga, Mountain Province, Ifugao, Benguet, central portion sang Pangasinan, kag nakatungdan nga bahin sang Nueva Vizcaya.
Signal no. 1 sa Batanes, Cagayan kalakip ang Babuyan Islands, western kag central portions sang Isabela, nabilin nga bahin sang Nueva Vizcaya, Quirino, nabilin nga bahin sang Apayao, nabilin nga bahin sang Pangasinan, northern kag central portions sang Zambales, Tarlac, kag western kag central portions sang Nueva Ecija.
Samtang ang Tropical Storm DANTE ang ulihi naman nga nasiplatan sa 790 km East Northeast sang Itbayat, Batanes.
Dala sini ang kabaskugon sang hangin nga nagadangat sa 75 km/h kag pagmadlos nga tubtob 90 km/h, samtang ini ang nagahulag sa Southwestward nga dereksyon sa kadasigon nga 15 km/h.
Ang Bagyo ang ginalantaw nga magaliko sa northwestward nga dereksyon sa Philippine Sea sa masunod nga 24 oras antes magliko sa west northwestward nga dereksyon padulong sa Ryukyu Islands kag East China Sea.
Ginalantaw nga maggwa sa Philippine Area of Responsibility ang Bagyo DANTE karun sa hapon ukon sa gab-i.
Ginalauman nga ini ang magapabilin sa tropical storm category tubtob nga makagwa sa PAR, apang wala man ginadula ang posibilidad nga ini ang magasanyog sa severe tropical storm category.
Lauman ang mabulubagyuhon nga panahon sa Ilocos Region kag Cordillera Administrative Region bangod sa Severe Tropical Storm EMONG.
Maulanon kag mabaskog naman ang hangin sa Batanes, Cagayan, Isabela, Zambales, Tarlac, kag Nueva Ecija bangod gihapon sa Bagyo EMONG.
Samtang monsoon rains naman ang mabatyagan sa Metro Manila, Bataan, Pampanga, Bulacan, Cavite, Laguna, Batangas, Rizal, kag Occidental Mindoro bangod sa Southwest Monsoon ukon Hangin Habagat.
Magal-umon man ang kalangitan nga makatuga sang lapnagon nga mga pag-ulan kag thunderstorms sa nabilin nga bahin sang Cagayan Valley bangod sa Bagyo EMONG.
Lapta-lapta nga pag-ulan ang mabatyagan sa nabilin nga bahin sang Bicol Region kag nabilin nga bahin sang Visayas bangod sa Habagat.
Samtang makanay naman ang panahon sa Mindanao, apang yara gihapon ang posibilidad sang mga tumalagsahon kag makadali nga mga pag-ulan bangod sa Habagat.
