Ginbayaran na sang Bacolod City Water District (BACIWA)- PrimeWater ang Bacolod Bulk Water Incorporated (BBWI) sang isa nila ka bulan nga utang samtang ginaproseso pa ang pagbayad para sa isa pa gid bill.
Suno kay Bacolod City Greg Gasataya, nagpahibalo na ang BACIWA- PrimeWater sa iya nga nakabayad na sila sang utang para sa bulan sang Mayo samtang ginaproseso naman ang balayran sa utang para sa bulan sang Hunyo.
Suno diri, ang koleksyon sang water district wala na ginapadala pa sa central office sang PrimeWater sa Manila agud nga madasig ang pagbayad sa supplier.
Madumduman nga sang Sabado, nag-anunsyo ang BBWI nga untaton nila ang pagsupply sang tubig sa BACIWA-PrimeWater kun indi magbayad ang PrimeWater sang masobra P5 million nga utang sini.
Suno sa alkalde, dapat hatagan sang pagtamod ang problema sa tubig sa ciudad kag madamo naman sa karun sang ginapatigayon nga imbestigasyon.
Pahayag ni Gasataya, kun sin-o man ang may lapses, dapat nga atubangon sini ang iya sala samtang nagpasalig naman siya nga maga-focus ini sa paghatag sang solusyon sa problema bangod madamo sa mga pumuluyo sa ciudad ang nagaka-apektohan.
