Nangin madinalag-on ang una nga Regional Development Council – Negros Island Region (RDC-NIR) Full Council and Sector Committee Organizational Meeting nga ginpatigayon sa Dumaguete City, Negros Oriental.
Ang meeting gintambongan nanday Negros Occidental Governor Eugenio Jose ‘Bong’ Lacson, Siquijor Governor Jake Vincent Villa kag Negros Oriental Governor Manuel Sagarbarria.
Sa interview sang Bombo Radyo kay Governor Lacson, gin-eliher bilang chairman sang RDC-NIR si Sagarbarria samtang siya naman gin-eliher bilang chairman sang NIR RDC Economic Development Committee.
Suno diri, ginpamangkot siya kun luyag niya mangin chairman sang RDC-NIR apang ginpakamaayo sini nga inominate si Sagarbarria sa pwesto.
Suno pa kay Lacson, ang iya pagpa-iway sa pwesto ang makahatag naman sang ligwa para sa masunod nga gobernador sang Negros Occindental nga mangin chairman sang RDC-NIR sa 2028.
Samtang, ginbaton naman ni Lacson ang pag-eliher sa iya bilang chairman sang NIR RDC Economic Development Committee agud mabuligan ang mga negosyante sa probinsya.
Pahayag sang gobernador, namensyonar ni Sagarbarria ang interconnectivity sa tatlo ka probinsya paagi sa national highways kag pagpa-imprubar sang airport sang Siquijor kag Occidental.
Samtang, balantayan naman ang masunod nga Regional Development Council – Negros Island Region meeting sa Disyembre 10 kun sa diin mas detalyado ang plano para sa tatlo ka probinsya sang Negros Island Region.
