Subong nga Biyernes, padayun nga magatuga sang madamol nga mga pag-ulan ang Low Pressure Area kag Southwest Monsoon ukon Hangin Habagat sa dako nga bahin sang pungsod.
Alas-3:00 kaina sang kaagahon, ang LPA ang ulihi nga nasiplatan sa 150 km sa nasidlangan sang Baler, Aurora.
Ini ang nagahulag sa nakatungdan nga dereksyon kag ginalauman nga magatabok na sa kadutaan sang Central Luzon subong nga adlaw.
Ini ang makalapos naman sa West Philippine Sea karun sa gab-i ukon bwas sa kaagahon.
Mataas ang posibilidad nga mangin Bagyo ukon Tropical Depression ang LPA sa masunod nga 24 oras, nga mahimo matabo antes pa ang paglandfall, ukon sa pagdangat na sa West Philippine Sea.
Apang Bagyo man ukon LPA, parehas nga malauman ang mabaskog nga mga pag-ulan nga mahimo makatuga sang mga pagbaha ukon landslide sa dako nga bahin sang Luzon, gani padayun man ang pahanumdom sa doble nga paghalong.
Sa pihak nga bahin, ang Hangin Habagat ang magadala man sang maulanon nga panahon sa nabagatnan nga bahin sang Luzon, Visayas kag Mindanao.
Gani yara man ang posibilidad sang pagluntad sang mga pagbaha ukon landslide.
Lauman nga magapadayun ang maulanon nga panahon dala sang LPA kag Habagat tubtob bwas.
Samtang maganubo naman ang porsyento sang pag-ulan pagdangat sang Domingo ukon Lunes, magluwas sa mga pag-ulan nga dala sang Habagat partikular na sa nakatungdan nga bahin sang Luzon.
