Pilason ang isa ka lalaki matapos ginlabo sang abyan sa Sitio Tugas, Barangay Cabadiangan, Sipalay City, Negros Occidental.
Ginkilala ang biktima nga si Alyas Henry, 40 anyos kasado kag isa ka laborer nga residente sang nasambit nga lugar.
Sa interview sang Bombo Radyo Bacolod kay Police Lt. Cipriano Lumanog III, Deputy Chief of Police sang Sipalay City Police Station, nagainum sang makahulubog nga ilimnon ang biktima kag sang papauli na, siya ang ginsundan sang suspek kag ginlabo kun sa diin nakaangkon sang pilas sa kamot ang biktima.
Wala man mahibaluan sang biktima kun ano ang rason nga siya ang ginlabo sang suspek nga tubtob sa karun at large sa gihapon.
Dugang pa ni Lumanog nga matawhay lamang nga naga-inum ang biktima kag ang suspect kag wala man sang pag bayluhanay sang malain nga estorya.
Gani nakibot ang biktima kun ngaa siya ang ginlabo sang suspek.
Isa sa ginalantaw nga motibo sang kapulisan amo ang bangud sa kahulugbon.
Pahanumdom ni Lumanog nga kun makainum sang makahulubog nga ilimnom ibutang ini sa tiyan kag indi sa ulo agud nga malikawan ang kaangay nga insidente.
