Budget deliberations para sa DPWH budget, ginpaiway; Ahensya ginhatagan sang isa ka semana agud kay-uhon ang anomalya

Ginpaiway sang House Appropriations Committee ang budget deliberations sang Department of Public Works and Highways (DPWH) nga yara sa kapin P881 billion para sa fiscal year 2026.

Isa ka semana ang ginhatag sang komite sa ahensya agud kay-uhon ukon i-correct ang ila tuigan nga budget nga nadiskubrehan nga may mga anomaliya ilabi na sa flood control projects.

Nagfile sang motion si Mamamayang Liberal partylist Rep. Leila de Lima agud manduan ang Department of Budget and Management (DBM) kag Department of Public Works and Highways (DPWH) nga magpasa sang panibag-o nga proposal natuhoy sa ila budget.

Gin-aprubahan sang komite ang motion ni De Lima kun sa diin dapat mapasa ini sang DMB kag DPWH sa tunga sang Setyembre 15 ukon Setyembre 16.