Nakaangkon sang kabudlayan ang pagpatigayon sang preemptive evacuation sa Sitio Tamburong, Brgy Biak-na-bato, La Castellana, Negros Occidental.
Sa interview sang Bombo Radyo Bacolod kay La Castellana Municipal Disaster Risk Reduction and Management Office Head John de Asis, nag-umpisa ang pagsaka sang tubig alas-2:00 kaina sang kaagahon bangod sa mabaskog nga bubo sang ulan.
Alas-8:00 kaina sang aga, nag-awas na ang Ibid Creek nga nagpabaha sa pila ka mga pamalay sa lugar.
Madumduman nga may ongoing operations na sa Ibid Creek nga nangin patag na bangod sa pagtambak sang mga volcanic materials.
Apisar sa clearing operations, padayun man gihapon ang pag-ilig sang volcanic materials nga nagadeposito sa sapa gani madasig nga nag-awas.
Ini ang ginalakipan sang balas, lutak kag magagmay nga mga bato.
Alas-4:00 tubtob alas-5:00 kaina sang kaagahon, tuyo kuntani nga dal-on ang mga apektado sa Barangay Evacuation Center, apang wala madayun bangod sa indi malabayan nga Tamburong bridge.
Suno kay De Asis, nagadangat sa 60 metros ang road debris nga nagakinahanglan sang heavy equipments agud nga mahimos kag liwat nga malabayan.
Temporaryo anay nga ginpatinir ang mga evacuees sa balay sang isa sa mga Barangay Kagawad, nga nagserbe nga temporary shelter.
Suno kay De Asis, gilayon man isaylo sa Barangay Evacuation Center ang nag-evacuate kun mahimo na nga malabayan ang taytay.
