May narekober nga armas-luthang sa sulod sang bag sang isa sa biktima sa ginluthang nga mag-utod sa Purok Active, Brgy Mandalagan, Bacolod City.
Sa interview sang Bombo Radyo Bacolod kay Police Major Rondyl Tapang, station commander sang Bacolod Police Station 3 nagatipon sila sang CCTV footage sa area agud makilal-an ang riding in tandem nga suspek nga nagluthang sa mag-utod nga sanday Harold kag Harly Espina.
Suno diri santo sa nakawitness, ang isa ka suspek wala sang tabon ang nawong kag nagasuksok sang pink nga tshirt kag sila nagasakay sa Rusi nga pula.
Dead on the spot ang magulang nga si Harold matapos nga gintiro sa likod nga naglapos sa dughan sini samtang ang manghod naman nga si Harly gintiro man sa likod apang nahingagaw nga madala sa ospital.
Samtang, nakumpiskar sa sulod sang bag ni Harold ang isa ka armas luthang.
Ini naputos sa pula nga bayo kag may anum ka bala.
Pahayag ni Tapang, ipaidalum pa sa forensic examination ang nakumpiskar nga unknown calibre.
Samtang, Ginpahayag sang ugangan sang isa sa biktima sang shooting incident sa Purok Active, Brgy Mandalagan, Bacolod City, kaina sang aga nga wala sila sang nakilala nga kaaway sang mag-utod.
Ang mga biktima amo ang mag-utod nga sanday Harold Espina kag Harly Espina kag suno kay Rogelio, ugangan ni Harold, may karenderya ang mag-utod malapit sa isa ka call center sa ciudad sang Bacolod.
Suno diri, papauli na kun tani ang mag-utod sang nagluntad ang insidente.
Pahayag ni Rogelio, wala man sila sang nakilala nga kontra sang duha kag maayo man nga tawo ang pagkilala sini sa ila. Samtang, wala sang record sa Brgy Mandalagan, Bacolod City ang mag-utod nga bata sang anay Brgy Tanod nga ginluthang kaina sang aga.
Ang mag-utod nga sanday Harold Espina kag Harly Espina ginluthang sa Purok Active, Brgy Mandalagan sang papauli na.
Sa interview sang Bombo Radyo Bacolod kay Punong Barangay Paul Anieve, ang duha ka mag-utod bata sang anay Brgy Tanod kag wala man sila nakaparekord sa Brgy kag wala man sang may nagreklamo batok sa ila.
Suno diri, masubo kag masakit para sa iya ang natabo sa duha, nga ulihi sini nakita sang nagtaliwan ang ila amay.
