Pilason ang Brgy. Kagawad matapos ginbuno sang ice pick sang lalaki nga nagmaoy sa upper Balicaocao, Brgy. Orong, Kabankalan City, kahapon pasado alas-10:00 sang aga.
Ang suspek ang ginkilala nga si Alyas Paquito samtang ang biktima naman amo si Brgy Kagawad Alyas Rex, lunsay mga residente sang nasambit nga Brgy.
Sa interview sang Bombo Radyo Bacolod kay Police Captain Sammy Gasataya, Deputy Chief of Police sang Kabankalan City Police Station, ginreklamo sang mga tawo si Paquito bangod nagamaoy ini kag nagapanghana nga mamuno sang bitbit niya nga ice pick.
Suo diri, nangayo sang bulig ang mga residente sa Brgy kag amo nga nagresponde ang Brgy tanod kaupod si Brgy kagawad Rex.
Ginapalapitan ni Rex si Paquito para esturyahon apang hinali lang siya ginbuno ni Paquito sa dughan.
Nakita sang isa ka gwardya sa lugar ang natabo kag gintiro sini si Paquito sa natoo nga kamot.
Gindala sa ospital ang duha nga napilasan kag out patient na si Rex samtang si Paquito naman padayon nga ginabulong kag siya pasakaan sang kaso nga direct assault.
