Patay ang isa ka purok chairwoman matapos nga gintiro sang lima ka mga wala makilal-an nga lalaki sa Sitio Mana-uban, Purok 5, Brgy. Lina-on, Cauayan, Negros Occidental.
Sa interview sang Bombo Radyo Bacolod kay Police Lt Raffy Billiones, Deputy Chief of Police sang Cauayan Municipal Police Station, nagpadulong ang lima ka mga lalaki nga armado sang malagba nga armas-luthang sa atubang sang balay sang biktima.
Ginhambalan sang mga suspetsado ang pamilya nga magsulod sa balay.
Suno kay Billiones, nag-estorya ang suspetsado sa biktima tubtob nga hinali nalang ini nga ginpaulanan sang bala.
Nag-angkon sang mga samad sa nanarisari nga bahin sang iya lawas ang biktima nga gintunaan sang gilayon sini nga kamatayon, samtang ang suspetsado ang nagpalagyo man gilayon sa wala mahibaluan nga direksyon.
Gindala pa ang biktima sa Cauayan District Hospital, apang gindeklarar nga dead on arrival.
Sa karun ginatumod pa sang mga kapulisan ang motibo sa krimen.
Narecover sa crime scene ang isa ka empty cartridge case sang 5.56 mm rifle; isa ka empty cartridge case sang 7.62 mm rifle; duha ka deformed bullets sang 7.62 mm rifle kag isa ka deformed slug sang 7.62 mm rifle.
Isa sa mga ginalantaw nga mahimo katapo sang New People’s Army ang mga armado nga suspect, apang sa karun wala pa sang ebidensya nga direkta nga magatudlo sa mga ini.
Ginatumod paman sa karun ang identity sang mga suspect.
