Ginklaro sang Philippines Red Cross Negros Occidental Bacolod City Chapter Administrator ang importansya sang pagdonar sang dugo sa karun nga sunod-sunod ang pagluntad sang natural disasters sa Pilipinas.
Ini kasunod sa Dugong Bombo bloodletting activity sang Bombo Radyo Philippines sa Nobyembre 15.
Sa interview sang Bombo Radyo Bacolod kay Rita Benita P. Mirasol, isa sa ginapreparahan nila sa Red Cross amo ang Dugong Bombo bloodletting activity nga dululungan nga hiwaton sa 15 kag key areas sa bug-os nga Pilipinas.
Suno diri, nagluntad ang linog kag naglabay ang bagyo kag madamo sang mga biktima nga nagakinahanglan sang dugo.
Para sa iya, ang pagdonar sang dugo amo ang preparasyon sa mga natural disasters nga indi malikawan kaangay na lamang diir sa Negros Occidental nga naeksperyensyahan ang pagbaha, paglinog kag paglupok sang bulkan.
Pahayag sini kun madamo sang supply sang dugo, madamo man sila sang mga ospital nga madul-ongan kag ginpadumdum sini nga ang single donation makasalbar na sang tatlo ka kabuhi.
Pahayag ni Mirasol, yara sa mandato sang Red Cross nga maghatag sang dugo sa nagakinahanglan apang mas manami suno diri kun madamo sang madonar agud madamo pa gid sang mabuligan.
Nagapangagda ini sa tanan nga magpartisipar sa nagahilapit nga Dugong Bombo blood letting activity sa Nobyembre 15 sa City Mall Mandalagan, Brgy Mandalagan, Bacolod City.
