Padayon ang trabaho sang Negros Electric and Power Corporation agud mapabalik ang kuryente matapos ang paglaslas ni Bagyo Tino.
Suno kay Engr Bernard Bailey Del Castillo, chief operation officer sang NEPC, na-energized na ang tanan nga lima ka subtransmission line nga amo ang main source halin sa National Grid Corporation of the Philippines.
Kasunod sini amo ang pag-energized kag pagkay-o sa mga substations kag suno kay Del Castillo, sa 11 ka substation may tatlo na lang nga wala na-energized nga ginalakipan sang Panaogao substation, Lopez substation kag Gonzaga substation.
Pahayag sini, may kadugayon sa pagrestore sang kuryente sa bahin sang Panaogao substation kag Lopez substation bangod may yara sang apat ka poste nga naguba nga nahamtang sa tunga sang kampo.
Dugang pa sini, 13 na ka feeders ang na-energized nga ginalakipan sang Alijis Feeder 4 kag 8; Reclamation Feeder 1, 2, 4, kag 5; Burgos Feeder 3 kag 4; Mountain View Feeders 4 kag 5; Talisay Feeder 1, 2 kag 3.
Suno kay Del Castillo, padayon ang ila trabaho subong nga hapon tubtob bwas nga adlaw.
Samtang, padayon man ang ila damage assessment kun sa diin nagdangat na sa 98 ang numero sang poste nga nagkalaguba, 274 ka conductors ang may kinlanlan nga islan nga wires kag mga transformers kag insulator nga nagkalaguba man.
Santo sa ila damage assessment, vegetation ang nagapanguna nga rason sang power interruption.
Nagpasalig naman ang NEPC nga nagahalong sila sa pagswitch nga mabalik ang kuryente agud wala sang may madisgrasya.
Samtang, gin-athag sang Regional Corporate Communication Officer sang National Grid Corporation of the Philippines (NGCP) – Western Visayas nga wala na sang problema sa ila nga bahin kag ginahulat na lang nga matapos sang Negros Electric and Power Corporation ang ila trabaho agud mabalik na ang kuryente.
Sa interview sang Bombo Radyo Bacolod kay Michelle Visera, ang NGCP amo ang generator supplier sang kuryente kag malabay anay sa transmision line sang NGCP ang kuryente antes makalab-ot sa substation sang Negros Power.
Suno diri, nagtrip off ang Bacolod- San Enrique line nga nag-apekto sa Sum-ag kag Hilangban substation sang NEPC kag San Enrique, La Carlota kag Valladolid substation sang Negros Occidental Electric Cooperative (NOCECO).
Kaina sang aga na-energized na ang Bacolod, Valladolid, Sum-ag kag Hilangban substation apang ang rason nga wala pa sa gihapon sang kuryente sa tagsa ka mga panimalay amo nga wala pa nakatapos sang trabaho ang NEPC.
Samtang sa ang linya sa Bacolod- San Enrique posible nga mapabalik subong nga hapon bangod may yara sang poste nga ginkay-o.
