Nagpaandam ang anay Overseas Filipino Worker sa mga Pilipino nga maghalong sa mga recruitment agency matapos ini nga ginmaltrato sa Malaysia.
Sa interview kay Gemma Saloria sang Brgy Bagroy, Bago City sa Ipa- Bombo Mo Segment sang Bombo Radyo Bacolod, sang Mayo 17 nag-apply ini sa Joseline International Manpower Corporation Agency para magtrabaho sa Malaysia.
Suno diri, nagpadulong ini sa Manila kag sang Hunyo naka-abot na ini sa Malaysia.
Ginkuha siya sang iya employer kag ginhambalan nga ang trabaho sini amo bilang Domestic Helper kag magbantay sang ido.
Siya nagtrabaho sa pamilya nga lunsay Chinese national kag didto na ini gin-abuso.
Wala ini ginpakaon sang iya mga amo kag wala gid ini nagtesting nga magkuha sang pagkaon bangod may CCTV sa balay.
Nakaagi nga nagbakasyon ang iya ama sa Hong Kong, kag nabilin si Saloria sa iya amo kag sa bata nila nga lalaki.
Sa sulod sang 13 ka adlaw, wala ini ginpakaon sang iya amo bangod suno sa amo niya wala siya nadala sa budget kag tubig na gid lamang ang nagbuhi sa iya samtang padayon nga nagatrabaho.
Sang nagpauli ang iya ama, nakita sini nga naglain na ang batasan ni Saloria kag kaangay nga wala ini sa iya paminsaron.
Gindala siya sang iya ama balik sa agency kag didto ginpamangkot kun nangawat ini kag nanugid si Solaria nga wala.
Ginpa-uba si Solaria sang agency bisan nga yara pa ang iya menstruation para makita kun bala may gintago ini sa iya bayo.
Matapos ini, gindala nila si Solaria sa clinic kag didto may gin-inject sa iya kag may bulong nga ginpa-inom.
Gin-ako man sini mismo nga may deperensya na siya sa paminsaron matapos ang naagyan sini sa Malaysia.
Bangod may gintago ini nga cellphone, nakamensahe ini sa Overseas Workers Welfare Administration (OWWA) kag nangayo sang bulig agud mapapauli ini sa Pilipinas. Samtang, ginpahayag sang stepfather sang anay Domestic Helper sa Malaysia nga may pagbag-o na sa iya manak sang maka-abot ini sa Pilipinas.
Sa interview kay Johnny Labrinca, masami nga naga-video call ang iya manak nga si Gemma Saloria sa iya iloy apang sang 13 ka adlaw na ini nga wala nakatawag sa ila, didto na sila nabalaka.
Suno diri, nakibot na lang sila sang ginsugiran sila nga si Saloria yara sa ospital.
Sang yara si Saloria sa accommodation sang agency, nakatawag ini sa ila kag nakita nila nga kaangay maluya ini kag tuman na ka niwang.
Sang nagpauli sa Pilipinas ang iya manak, naglain ang iya batasan kag siya magahod na gid kag nagasinggit pa kun kaisa.
Gindala nila ini sa doctor kag ginhambalan sila nga indi na pagpa-imnon sang bulong si Saloria nga dala sini halin sa Malaysia bangod ini nagadugang sa pagkaguba sang iya paminsaron.
Paandam ni Labrinca, maghalong sa mga nagapangrecruit kag kun may mahibaluan nga illegal agency, ireport ini gilayon.
