Ginbasura sang lima ka panel judges sang International Criminal Court (ICC) Appeals Chamber paagi sa “unanimous” decision ang hingyo nga interim release ukon temporaryo nga kahilwayan ni former President Rodrigo Duterte sang Biyernes, Nobyembre 28.
Ginbasa ni ICC Appeals Chamber Presiding Judge Luz del Carmen Ibáñez Carranza ang nasambit nga desisyon.
Ginpabakod sang Appeals Chamber ang nangin desisyon sang Pre-Trial Chamber I nga una na nga ginbasura ang apela sang anay Presidente para sa interim release, kun sa diin nakit-an nga kinahanglan nga ipabilin nga nakadetain ang anay Presidente sang Pilipinas.
Apang sa apelasyon sang kampo ni Duterte, ginrason nga wala napamatud-an sang Pre-Trial Chamber I nga may flight risk ukon risgo nga palagyuhan sang anay Presidente ang hearing sa ginaakusar nga crimes against humanity batok sa iya.
