Na-retrieve sang mga otoridad ang bomba nga nasal-an sang mga pumuluyo nga treasure sa Purok Paghidaet, Brgy. Fabrica, Sagay City sang Disyembre 24.
Sa interview sang Bombo Radyo kay Police Captain Alberto Sardua Jr., Team Leader sang Provincial Explosive Ordnace Disposal and Canine Unit sang Negros Occidental Police Provincial Office, sila ang gilayon nga nagresponder upod sa Sagay City Police Station sang mabaton ang report halin sa isa ka pumuluyo sang Disyembre 28, nga nag-aso ang nasal-an nila nga treasure.
Gilayon man nga nagpatigayon ang kapulisan sang emergency disposal kag na-retrieve ang bomba nga natumod nga Cartridge 60MM HP kag ini ang ginpalupok sa hilway nga lugar.
Suno kay Sardua, ang bomba ang nakutkotan sang may ginakay-o nga drainage sa nasambit nga lugar.
Gintago sang pumuluyo sa ila puluy-an ang bomba sa sulod sang tatlo ka adlaw bangud nasal-an nila ini nga treasure.
Suno diri, posible ang bomba ang gikan pa sadtong World War II, apang ang bomba ang wala sang expiration gani ini ang posible nga maglupok sa bisan ano nga oras.
