Serbihan sang Land Transportation Office – Negros Island Region sang show cause order ang operator ukon kompanya, driver kag konduktor sang modernized jeepney nga ginreklamo bangod sa nagasulobra nga pasahero.
Madumduman nga madasig nga naglapta sa social media ang video sang nagaginutok nga modernized jeep kag ang indi nagakaigo nga pagsabat sang konduktor sa nagareklamo nga pasahero.
WATCH: https://www.facebook.com/share/v/182JmKkg1k/
Sa interview sang Bombo Radyo Bacolod kay LTO-NIR Director Jeck Conlu, matapos mabatun sang ila nga social media team ang video footage, gilayon nila ini nga ginforward sa Investigation and Intelligence Unit sang ahensya.
Naka-estoryahanay man sila ni Bacolod City Mayor Greg Gasataya, nga nagmando nga imbestigahan kag himuan sang tikang ang reklamo.
Subong nga adlaw, natalana na nga padal-an sang show cause order ang Presidente ukon chairman sang MBMJ and UY Transport Services Inc.
Itugyan man diri ang pagtumod sa driver kag konduktor sang nasambit nga modernized jeepney unit, agud mapadal-an man sang show cause order.
Ini ang dapat masabat sang mga natundan sa sulod sang lima ka adlaw, kag nakadepende man sa assessment sang ila sabat ang idagdag nga sanction kag penalidad.
Suno kay Conlu, sa pagbatun sang show cause order, automatic na nga suspendido ang driver sa sulod sang 90 ka adlaw.
Ini bangod sa mga violation kaangay sang overloading kag reckless driving.
Hibaluon man kun may conductor permit ang konduktor, kag kun may-ara ini ang mahimo ma-revoke kasubong man kun siya ang may driver’s license, kag sarang man ini nga ma-ban sa pagtrabaho bilang konduktor.
Pahanumdom sini sa tanan nga drivers nga non-negotiable ang safety sang pasahero.
Suno kay Conlu, sang Nobyembre tubtob Disyembre 2025, sila ang nakapagwa sang 25 ka show cause order batok sa mga public utility vehicles nga nagabayolar sang traffic rules.
Paathag sini nga bisan wala sang complaint, kun makita sang ila social media team ang footage sang traffic violation sa social media sila ang sarang makapagwa sang show cause order.
