Arestado ang elected Councilor sa banwa sang Sta Catalina sa drug buybust operation nga ginpatigayon sa Sitio Nagbagang, Brgy Poblacion, Sta Catalina, Negros Oriental alas-2:35 kahapon sang hapon.
Ang konsehal ang ginkilala lamang nga si Alyas Daniel, 29 anyos, nga amo man ang nagamanage sang drug den.
Kaupod man nga naaresto sanday Alyas Alex, 29 anyos, call center agent, residente sang Brgy Ubos, Bayawan City; Alyas Sheldon, 23 anyos, laborer, residente sang Brgy Poblacion, Sta Catalina; samtang nakapalagyo naman si Alyas Joseph.
Sa operasyon nga ginpangunahan sang anti-narcotics operatives sang Philippine Drug Enforcement Agency – Negros Island Region (PDEA-NIR).
Narecover sa mga ini ang 16 ka sachet sang suspected shabu, nga ginabanta nagabug-at sang 20 gramos, buybust money, drug paraphernalia kalakip ang improvised glass tooters, aluminum foil strips, disposable lighter, kag may-ara man sang narecover nga Glock 43 nga armas-luthang nga kargado sang bala.
Ang mga naaresto ang mangatubang sang pila ka kaso sa paglapas sa Republic Act 9165 ukon Comprehensive Dangerous Drugs Act of 2002, kalakip ang paglapas sa section 5 (pagbaligya), section 6 (pagmentinar sang drug den), section 7 (employees kag visitors sang drug den), section 11 (paghupot sang illegal nga droga), kag section 12 (paghupot sang drug paraphernalia); kasubong man ang kaso sa paghupot sang armas-luthang kag ammunition.
