Pirmado na ang memorandum of agreement sa tunga sang Bacolod City Government kag nagkalain-lain nga sector, agud nga mahatagan ang mga ini sang dugang nga livelihood assistance paagi sa Sustainable Program for Resilient and Optimum Urban Transformation (SPROUT).
Nagpain ang Bacolod City Government sang P9 million agud nga pondohan ang nagkalain-lain nga sector kag una na diri ang accredited nga homeowners association, transport, fisherfolks kag farmers association.
Ini ang ginalakipan sang Gardenville Homeowners Association, Inc. (GHOA Inc), Senior Citizen Association of Purok San Dionisio Inc., Central Area Federation of Tricycle Operators and Drivers Association of Bacolod City (CAFTODA), Metro Bacolod Chamber of Commerce and Industry, Bacolod Fisherfolks Federation, Bacolod City Integrated Small Farmers Federation kag Federation of Homeowners Association.
Kalakip man diri ang Bacolod Environment and Natural Resources Office (BENRO) kag City Development and Planning Office para sa ila nga mga special project.
Ang mga nasambit nga organisasyon ang makabaton sang nagkalain-lain nga amount kun sa diin ang pinakamanubo ang yara sa P500,000 kag ang pinakadako amo yara sa P3 million tubtob P5 million.
Suno kay Bacolod City Mayor Greg Gasataya, dako ini nga bulig sa mga fisherfolks ilabi na sa tion sang bagyo kun sa diin sila ang indi makapanagat, may-ara ang mga ini sang iban nga palangabuhian.
Dako man ini nga bulig para sa mga mangunguma, kun mahatagan pa sila sang lugar agud nga makatanum sang dugang.
Sa tion nga maglapad ang ginatamnan dako man ang produksyon kag magadamo man ang supply sang pagkaon sa Bacolod City.
Isa sa katuyuan sang SPROUT amo ang Urban Greening kaangay sang mga homeowners nga makatanum sa bakante nga lote kasubong man makahatag sang livelihood sa mga TODA.
