Nagdangat sa masobra 800 ka mga indibidwal ang nag-evacuate gikan sa banwa sang Toboso bangod sa nagluntad nga engkwentro sa tunga sang 79th Infantry Battalion sang Philippine Army kag mga miyembro sang New People’s Army (NPA).
Base sa inisyal nga impormasyon, indi magnubo sa 19 ka mga rebelde ang napatay sa madugay nga engkwentro nga natabo sa Brgy. Salamanca, Toboso kahapon, Abril 19, nga nagsugod humalin aga tubtob hapon.
Sa interview sang Bombo Radyo Bacolod kay 1st Lt. Fevie Fajardo, Civil-Military Operations (CMO) sang 79th Infantry Battalion, sila ang nagpatigayon sang pagpapanaug sang mga residente sa tagsa nila ka mga siito padulong sa evacuation centers bangod sa red alert status sa area.
Suno kay Fajardo, santo sa datos nga ila nakolekta, may yara 77 ka pamilya ukon 326 ka indibidwal ang gin-evacuate sa Labi-Labi Elementary School, Brgy. San Jose, samtang 85 ka pamilya ukon 303 ka indibidwal ang yara sa Salamanca Elementary School kag anum ka pamilta ukon 24 ka inidbiwal sa Toril Elementary School sa Brgy. Salamanca.
Samtang, sa ciudad sang Escalante, partikular sa Barangay Udtongan, may yara sang 57 ka households ukon 196 ka evacuees.
Suno diri, sila ang nakakoordinar na sa lokal nga panguluhan kasubong man sa Department of Social Welfare and Development (DSWD) agud mahatagan sang nagakaigo nga bulig ang mga evacuees.
Suno pa kay Fajardo, nagsugod kahapon ang evacuation pasado alas-12:00 sang hapon tubtob sa gab-i.
Mensahe ni Fajardo, unahon gid ang kaugalingon nga kaluwasan kag mag-agwanta gid anay samtang wala pa natapos ang retrieval operations kag yara pa gihapon sa red alert status.
