Ginpresentar sa House Committee on Justice ang mga alegasyon ni former senator Antonio Trillanes IV nga nakabaton ang pamilya ni anay Presidente Rodrigo Duterte sang kabug-usan nga P181.6 million nga gin-alegar gikan sa isa ka drug lord nga ginkilala kay Sammy Uy.
Sa iya sworn statement, ginpahayag ni Trillanes nga ang gin-encash nga tseke ang nagkadto sa nagkalain-lain nga katapo sang pamilya Duterte lakip na si Vice President Sara Duterte nga gin-alegar nakabaton sang P22.3 million.
Ang listahan ang nagalakip man sang iban pa nga mga myembro sang pamilya nga may nagkalainlain nga kantidad sang mga transaksyon.
Ginpanindugan pa ni Trillanes nga ini ang sarang makonsiderar nga “impeachable offenses” kasubong sang betrayal of public trust, graft and corruption, kag iban pa nga mga mabug-at nga kaso.
Suno diri, si Sammy Uy ang angot man sa mas malapad nga network nga konektado sa nagligad nga mga isyu sa droga, lakip na ang mga personalidad kaangay sang anay economic adviser nga si Michael Yang nga may kaangtanan sa iligal nga droga kag POGO operations.
Samtang, ginkumpirmar man sang Anti-Money Laundering Council (AMLC) nga 18 ka mga transaksyon nga nasambit sa affidavit ni Trillanes ang nagasanto sa ila database, lakip ang pila ka mga transaksyon nga ginapahayag may kaangtanan kay Sammy Uy.
Sa subong, padayon ang pagrepaso sang Kamara sa mga dokumento kag testimonya bilang kabahin sang mas malapad nga imbestigasyon sa ginaalegar ‘unexplained wealth’ kag iban pa nga mga alegasyon batuk sa pamilya Duterte.
