Ginahulat pa ang resulta sang imbestigasyon sang Scene of Crime Operations (SOCO) kun ano ang gintunaan sang kamatayon ni Police Lt. Col. Romeo Vargas.
Si Vargas amo ang pinuno sang City Administrative and Resource Management Unit sang Bacolod City Police Office kag naabtan na lamang sang rescuers nga wala na ini sang kabuhi sa sulod sang iya balay sa Purok Zone 12, barangay Handuman, kahapon sang aga.
Ginkumpirma ni BCPO director Police Col. Eugene Rebadomia nga may gunshot wound ini sa natoo nga bahin sang iya ulo kag nakit-an ang iya personal firearms nga 45 calibre pistol sa area.
Sa interview sang Bombo Radyo kay Rebadomia, kahapon sang aga natingala ini kun ngaa late si Vargas sa trabaho bangod masami man ini nga naga-abot sang timprano.
Suno diri, nakabaton ini sang tawag nga nagtaliwan na si Vargas.
Suno kay Rebadomia, may mag concerns sadto si Vargas apang wala na sini ginsugid pa kun ano, kag naresolbar naman sini tanan.
Sang Lunes, naka-esturyahanay pa sila nga duha bangod malapit nalang magretire si Vargas kag naghambal ini nga plano niya maglagaw-lagaw sa iya pargretiro.
