Lapnagon subong sa mga kabataan sa South Korea ang ginatawag nga “dopamine sites” ukon mga website kag app nga ginkopya ang bug-os nga proseso sang online shopping nga wala sang may ginagasto nga kwarta.
Kaangay sang mga lehitimo nga online marketplace, mahimo makapili sang produkto, magbasa sang mga reviews, magbutang sa cart sang produkto, kag mag-order ang mga user.
May yara man sang tracking system nga nagapakita nga pakadto na ang courier sa address sang nagagamit sini.
Apang sa ulihi, wala sang produkto nga maabot kag wala man sang kwarta nga mabuhin sa ila.
Suno sa mga nagagamit sini, maeksperyensyahan nila ang excitement kag kalipay nga tuga sang pag-order samtang makalikaw sa gastos sa tunga sang mataas nga cost of living kag mga advertising.
Apang, nagpaandam ang pila ka mga eksperto nga apisar makabulig ini sa pagkinot sang kwarta, mahimo madugangan ang addiction sang isa ka tawo sa online shopping.
