Kapin 20 ka mga indibidwal ang ginbawian sang kabuhi, 85 naman ang pilason, kag masobra 20 ka residential buildings ang naguba, matapos maglunsyar sang large-scale missile kag drone strikes ang Russia sa capital sang Ukraine nga Kyiv.
Ginbakwit naman ang mga residente samtang nagapadayon ang pagpangbomba, pila ka oras matapos nagpaandam si Ukraine President Volodymyr Zelensky nga nagahanda ang Russia para sa malapad nga pag-atake.
Ginkumpirmar naman sang head sang military administration sang Kyiv nga si Tymur Tkachenko nga kalakip sa mga nautas ang kabuhi amo ang mga kabataan.
Suno diri, liwat nga gintarget sang Russia ang residential areas kag hungod nga ginapatay ang mga sibilyan.
Gin-ako naman sang Russian Ministry of Defense ang pag-target sa energy facilities bilang pagtimalos sa nakaligad nga airstrikes sang Ukraine.
