Wala ginsipot sang walo ka organization kag SK sang Brgy Felisa ang imbitasyon sang Sangguniang Panlungsod para sa scheduled public hearing nga patigayunon kuntani kahapon.
Madumduman nga nagdesisyon ang Chairman sang Committee on Laws and Ordinances, nga dayunon ang scheduled public hearing apisar nga ginbawi sang Victorias City ang request nga magahaboy sang residual waste sa Bacolod Sanitary Landfill.
Sa interview sang Bombo Radyo kay Bacolod City Councilor Al Victor Espino, ginpahayag sini nga tinutuyo kuntani sang public hearing nga mapamatian ang bahin sang nagapamatok sa amo nga proposal kag mapaathag ang tanan.
Suno sa Konsehal, ang social media ang indi husto nga platform sa paghabuyanay sang bisan ano nga istorya.
Ginpaathag man ni Espino ang iya paggamit sang tinaga nga “uneducated.”
Suno sa iya, wala ini nagatuhoy sa educational status sang isa ka tawo kundi ang kakulangan sang pag-intindi sa isa ka partikular nga isyu.
Pahayag sini nga bukas sa gihapon ang iya opisina kun luyag sang mga organisayon nga magpatigayon sang hearing.
