Kapulisan, may ginapangita pa nga “Alyas Eden” nga suspect sa pagpatay kay American Marine Biologist Dr. Edward Kent Carpenter sa Sibulan, Negros Oriental

Ginkumpirmar sang Negros Oriental Police Provincial Office (NORPPO) nga may dugang pa nga isa ka suspek nga ginalagas ang mga kapulisan may kaangtanan sa pagpatay sa 63-anyos nga American marine biologist nga si Dr. Edward Kent Carpenter sa Sibulan, Negros Oriental.

Sa interview sang Bombo Radyo Bacolod kay PCapt. Stephen Polinar, Public Information Officer sang NORPPO, ginbuyagyag sini nga luwas sa apat ka mga suspek nga yara na sa kustodiya sang kapulisan, may ginasundan subong ang Special Investigation Task Group (SITG) CARPENTER nga isa pa ka suspek nga ginkilala nga si alyas “Eden” nga nagapabilin nga at-large.

Samtang, pormal na nga ginpasaka ang kaso nga Robbery with Homicide batok sa apat ka mga suspetsado sang Hulyo 17.

Madumduman nga sang Hulyo 12, ginsulod sang mga armado nga indibidwal ang balay sang 63-anyos nga biktima sa Brgy. Ajong, Sibulan.

Hinali lang nga gintiro sang mga kawatan si Dr. Carpenter nga nagresulta sa iya kamatayon.

Padayon ang maid-id nga imbestigasyon kag hot-pursuit operation sang mga kapulisan agud madakpan ang dugang nga suspek kag mahatagan sang hustisya ang biktima.