Nakumpirmar sa laboratory test nga indi shabu ang nakuha sa 17 anyos nga Grade 9 student sa eskwelahan sa Brgy. Banago, Bacolod City sang Hulyo 20.
Sa interview sang Bombo Radyo Bacolod kay Police Captain Ma. Liberty Indiape, spokesperson sang Bacolod City Police Office, sa resulta sang ginpatigayon nga laboratory test sang Regional Forensic Unit sang Police Regional Office – Negros Island Region, naggwa nga indi illegal drugs ang duha ka putos sang crystallized substance nga una ginpatihan nga shabu.
Apang bangod test para makumpirmar kun illegal drugs lamang ang ila ginrequest, wala pa nila mahibaluan kun ano ang substance nga nakuha sang school guard gikan sa bag sang estudyante.
Bangod sini, sila ang wala na sang ipasaka nga kaso, samtang ginatugyan na nila sa social worker ang paghatag sang intervention sa estudyante.
Ang kapulisan ang padayun man nga nagakoordinar sa eskwelahan, kag padayun ang imbestigasyon sa posibilidad nga natrippan lamang ang estudyante.
Madumduman nga una ginreport sang mga classmate sini ang Grade 9 student sa school guard sa alegasyon nga ini ang may armas-luthang, apang sang gintsekyar ang bag, didto nakita ang duha ka sachet sang crystallized substance.
Ini ang nagtuga naman sang alarma kag pagkanselar sang klase sa buluthuan.
