Napulo sa 18 ka mga anay bodyguards ni former congressman Zaldy Co ang gin-aresto matapos mapaslawan nga makapiyansa angot sa mga kaso nga perjury.
Ang mga anay bodyguards ni Co ukon mas kilala sa pangalan nga “Maleta boys” ang nagapangatubang subong sang pila ka counts sang perjury.
Sa karon, 14 na lamang ang ginarepresentar ni Atty. Levi Baligod bangud nag-recant sang nakaligad nga adlaw ang apat.
Santo sa report, onse sa nabilin nga 14 ka maleta boys ang wala nakapiyansa matapos sila gin-isyuhan sang warrant of arrest bangud wala sila nakakadto sa Landbank.
Tatlo lamang ang nakapiyansa.
Apisar onse ang dapat kuntani nga i-detain, napulo lamang ang nabasahan sang ila Miranda rights kag napaidalom sa kustodiya.
Wala pa matumod kun diin ang ika-11 nga former bodyguard.
Gindala ang pulo ka maleta boys sa Las Piñas City Police Station kag didto magpabilin sa bilog nga semana.
Tagsa sa ila ang nagapangatubang sang apat ka counts sang perjury charges kag kinahanglan magbayad sang kabug-usan nga P72,000 nga piyansa.
Suno naman kay Atty. Baligod, gintinguhaan nila nga magpiyansa kahapon alas-8:30 sang aga sa Las Piñas court apang wala ini gilayon naproseso.
Suno sa pahayag sang abogado sa iya Facebook, indi dapat magtinir sa prisohan ang iya mga kliyente sa bilog nga semana sa posibilidad nga may matabo nga malain sa ila.
