Lusot na sa House of Appropriations panel ang proposed budget nga P10,155,758 billion sang Office of the President para sa fiscal year 2027 sa sulod lamang sang 15 minutos, matapos mahatagan sang parliamentary courtesy sa pihak sang pagpamatok sang pila ka mga minority lawmakers.
Si Executive Secretary Ralph Recto ang nag-atubang sa appropriations panel para idepensahan ang masobra P10 billion nga budget sang Office of the President.
Madumduman nga dako ang budget sang Office of the President para sa 2026 bangud sa pag-host sang Pilipinas sa Association of Southeast Asian Nations (ASEAN).
Nagapati si Recto nga supisyente ang nasambit nga pondo agud masabat ang tanan nga mga kinahanglanon sang pungsod ilabi na sa mga ginapangatubang sini nga mga pagtilaw, kalakip ang mga tensiyon nga geopolitical kag kinagamo sa Middle East, mga bagyo, El Niño, kag iban pa nga kalamidad.
Pagkatapos sang presentasyon ni Recto, nag-mosyon si Minority Leader Marcelino Libanan nga hatagan sang parliamentary courtesy ang Office of the President sa diin ginatapos na ang interpellations nga ginsegundahan naman ni Senior deputy Rep. Ferdinand Hernandez.
Ginpamatukan naman ni House Deputy Minority Leader kag ACT Teachers Rep. Antonio Tinio ang naangdan na nga proseso sang Kamara nga gilayon gina-aprubahan sa committee level ang proposed budget sang Office of the President matapos ang budget briefing kag wala na ginapaidalom sa maid-id nga pagtalakay.
Suno diri, dapat ipaathag sang Office of the President kun ngaa halos katunga sang pondo ang gin-alokar sa confidential kag intelligence funds.
