Nagpasalig ang Bacolod Alliance for Commuters Operators and Drivers (BACOD) nga wala sang dapat ikahangawa ang mga commuters bangod makadali lamang ang ila nga Protest Caravan.
Sa interview sang Bombo Radyo Bacolod kay BACOD President Rudy Catedral, ang proetst caravan ang patigayunon bilang suporta sa untat-byahe sang ila National federation nga MANIBELA.
Kun sa diin kapin 400 ka mga jeepney drivers ang ginalauman nga magapasakop.
Ang mga jeepney drivers kag operators ang magatipon sa Araneta Street sa atubang sang Bacolod Old Airport sa Brgy Singcang-Airport halin alas-9:00 tubtob alas-10:00 sang aga, samtang ang protest caravan ang magalibot naman sa Bacolod City Public Plaza alas-10:00 tubtob alas-11:00 subong nga aga.
Ang tikang ang ginhimo bilang pagpamatok sa padayun nga pagsaka sang presyo sang gatong, kun sa diin, sa karun nagadangat na sa P92 ang kada litro sang Diesel.
Suno kay Catedral, indi na masarangan sang mga drivers kun magdangat na sa P100 ang presyo sang gatong.
Panawagan nila sa gobyerno ang patas nga paghatag sang fuel discounts sa nakaparehistro man ukon wala nga mga public utility drivers.
Pasalig naman nila sa mga pasahero nga sila ang magabyahe sa peak hours, kag nagtalana lamang sang makadali nga tion para sa aktibidad.
