Ginpahanumduman sang regional director sang Police Regional Office – Negros Island Region ang mga ginikanan nga bantayan ang aktibidad sang ila mga kabataan kag kun may makita nga makaduluda, ireport ini gilayon sa mga kapulisan agud marespondehan.
Sa mensahe ni PRO-NIR Director Police Brig. Gen. Rudecindo Reales, ginpanugyanan sini ang mga ginikanan kag mga manunudlo nga kun may yara sang nakita nga pagbag-o sa pamatasan ukon paggawi magreport gilayon sa mga kapulisan.
Suno kay Reales, kadungan man sang ila pagresponde amo ang pag-verify sang nabaton nga report.
Sa pihak nga bahin natumod naman sang PRO NIR ang pila sa mga may kahimuan sang online threat sa mga eskwelahan sa probinsya sang Negros Occidental.
Isa na diri ang sa Victorias City kun sa diin nadiskubrehan sang mga otoridad nga toy gun ang ginpost sini online.
Panugyan sang provincial director sang PRO-NIR sa mga pumuluyo ilabi na sa mga estudyante nga ipaagi sa mas matawhay nga paagi kag likawan ang pagpost sini ilabi nga makahatag sang kakugmat sa publiko.
