Pabor ang National Citizens’ Movement for Free Elections (NAMFREL) sa desisyon sang Commission on Elections (COMELEC) nga pagkakas sang 50 ka Partylist Group sa masunod nga eleksyon.
Sa interview sang Bombo Radyo Bacolod kay NAMFREL Secretary General Eric Jude Alvia, may gahom ang COMELEC sa pagtinlo sang partisipante sa Partylist Group.
Suno diri, halos dekada na nga napabay-an kun sin-o ang makapasakop sa partylist group, kag indi na matuod-tuod nga nagarepresent sa marginalize sector.
Sa Republic Act 7941 ukon Partylist System Act, dapat nga paluson ang ang mga grupo nga indi makasulod sa duha ka magkasunod nga eleksyon.
Samtang May 10 naman nga napalos bangod sa kapaslawan nga malab-ot ang 2 percent threshold.
Suno diri, dapat makakuha sang at least duha ka porsyento sang total voters ang mga partylist groups, bangod kun mas manubo diri, nagakahulugan lamang nga sila ang indi suportado sang ila sektor nga ginarepresentar.
Suno kay Alvia, tuman ka laba ang gina-imprinta nga balota sa eleksyon bangod sa sobra sobra nga numero sang partylist group sa likod, gani mas maayo man kun ini ang mabuhinan.
Suno diri, dapat mabal-an gid kun sin-o ang genuine partylist kag may-ara gid sang plataporma.
Ini agud malikawan ang mga persona nga makasulod nga ginagamit lamang ang partylist system nga steppingstone agud makasulod sa mas mataas nga pwesto.
Sa pihak nga bahin, ang mga napalos ang sarang man nga makafile sang petisyon nga makonsiderar nga lehitimo nga partylist group.
