Magapasaka na sang kaso ang pamilya sang senior citizen nga babayi sa driver sang nakabunggo diri nga kotse sa Villa Socorro Subdivision, Circumferential Road, Brgy. Taculing, Bacolod City kahapon sang aga.
Sa interview sang Bombo Radyo Bacolod kay Police Major Elmer Bonilla, pinuno sang Bacolod City Traffic Enforcement Unit, ang driver ang pasakaan sang kaso nga Reckless Imprudence Resulting to Homicide.
Nahibaluan nga ang biktima ang ginkilala nga si Nancy Tan, 69-anyos, residente sang Phase 2, Gumamela Street, Espinos Village, Brgy Taculing.
Ang driver sang kotse ang ginkilala naman nga si Keirvey Franz Piojo, 18-anyos, residente sang Brgy. Alijis.
Samtang nagatabok sa pedestrian lane, si Tan ang nabungguan sang kotse ni Piojo, nga may mga sakay nga tatlo niya ka barkada.
Naglabog sang kapin 30 metros ang tigulang bangod sa impact, samtang ang suspect ang nagsungka naman sa isa ka gasolinahan kapin 300 metros gikan sa lugar sang insidente.












