Ginahulat pa sang Hinobaan Municipal Police Station ang resulta sang autopsy report agud makumpirmar ang gintunaan sang kamatayon sang 34 anyos nga lalaki nga nasapwan nga naga-utaw utaw sa dagat nga sakop sang Brgy Culipapa, Hinobaan alas-10:00 sang Lunes, Nobyembre 16.
Ginkilala ang biktima kay Alyas Ernesto, single, residente sang Purok 6, sa nasambit man nga Barangay.
Sa interview sang Bombo Radyo Bacolod kay Police Major Eric Doronila, Chief of Police sang Hinobaan Municipal Police Station, ang bangkay ang matig-a na sang masapwan sa bahin sang dagat nga may kadalumon nga pito ka metros, kag kapin 70 metros gikan sa baybayon.
Suno kay Doronila, santo sa pahayag sang nagapamana ukon spear fishing, nagakaya na sang nasapwan ang bangkay gani gilayon man sini nga ginreport sa Barangay, kag siya ang ginbuligan sang mga Barangay personnel nga madala sa shoreline ang biktima.
Ginpahayag man sang hepe nga sang nakita nila ang bangkay kag may yara sang dugo sa ulo sang biktima.
Apang santo sa ila pag-interview sa nagresponde nga embalmer kag personnel sang crime laboratory nga natural lamang nga reaction sang lawas sang tawo nga nalumos ang nakita nga dugo sa lawas sang biktima nga nalumos bangud sa current sang tubig sa idalom sang dagat kag paglutaw sini nangita na gwaan ang fluid sa lawas sini.
Sa inisyal nga imbestigasyon, ang biktima ang ulihi nakit-an kapin alas-8:00 sang gab-i sang Nobyembre 15, sa isa ka namatyan sa Prk 1, Brgy Culipapa.
Ginapatihan nga nalumos ang biktima, apang ginahulat pa ang resulta sang authopsy report agud matumod gid ang matuod nga rasun sang kamatayon sang biktima.












