Nagpagwa sang pahayag ang Philippine National Police kaangot sa nagalapta nga mga alegasyon sa social media sa gina-alegar nga pwersa nga pagpriso sang anay household staff member ni Vice President Sara Duterte kag apat ka indibidwal sa isa ka hotel sa Bonifacio Global City (BGC).
Kalakip sa mga alegasyon ang gina-alegar nga pagpilit sa mga ini nga magpirma sa isa ka affidavit nga nagaunod sang mga indi matuod nga alegasyon kasubong man ang pagpamahog sa kabuhi sang mga ini.
Suno sa PNP, seryoso ang nasambit nga alegasyon nga may kaangtanan sa illegal detention, pagpamilit kag pagpamahog gani kinahanglan nga maimbestigaran ini kag mahimuan sang tikang santo sa layi.
Sa pag-verify sang kapulisan, sang November 17, 2026, nagpadulong sa Fort Bonifacio Police Sub-Station 1 sa Taguig City ang duha ka mga abugado sang anay household staff member sang bise presidente agud nga magpangayo sang police assistance.
Nagpangayo ang mga ini nga updan agud nga makuha sa isa ka hotel sa BCGC ang anay staff kag apat ka iban pa nga indibidwal nga gina-alegar gin-detain didto.
Gilayon naman nga gin-updan sang mga police ang mga abogado padulong sa hotel.
Pag-abot sang mga ini sa lugar, nakita nila ang lima ka mga indibidwal nga hilway kag wala man nag-report sa anuman nga mga pagpamahog sa ila seguridad.
Boluntaryo naman nga nagpanaog ang mga ini gikan sa ila nga mga kwarto kag nag-upod sa mga police padulong police station.
Sa presinto, nagpamalibad ang lima ka mga indibidwal nga maghimo sang kaugalingon nga sworn affidavit angot sa report nga pagpriso.
Wala man sang mga ini gintumod kun sin-o ang sa likod sang insidente ukon kun sa diin naghalin ang mga ginapahayag nga pagpamahog sa ila nga kabuhi.
Kasunod sini, ginpasiguro sang Philippine National Police nga handa ini magbaton sang mga pormal nga reklamo kag sworn statement halin sa sin-o man ang magreklamo sang pagpamahog.
Nagpangako man ang ahensya nga magahatag sang nagakaigo nga police assistance kag protection santo sa ginapatuman nga proseso.
Liwat nga ginpanindugan sang Philippine National Police nga nagapabilin ini sang isa ka apolitical institution kag wala sang ginadampigan may kaangtanan sa politika.












