BACOLOD CITY — Magapungko na sa Lunes, Abril 3, ang bag-o nga acting provincial director sang Negros Occidental Police Provincial Office, bulos kay Police Senior Supt. William Señoron.
Nahibaluan nga sang gin-relieve sa pwesto si Señoron, ginbutang bilang caretaker si Police Senior Supt. Rolando Miranda halin sa Police Regional Office 18.
Sa interview sang Bombo Radyo kay Miranda kaina sang udto, ginpahayag sini nga magapungko na sa Lunes si Police Senior Supt. Rodolfo Castil Jr. nga halin sa Anti-Kidnapping Group sa Campo Crame.
Si Castil ang tumandok sang Pangasinan kag nangin estudyante ni Miranda sa Special Action Force.
Si Castil ang miyembro sang Philippine Military Academy Class 1993 samtang Class 1990 naman si Miranda.
Sa personal nga pagkakilala ni Miranda kay Castil, mapisan ini magtrabaho.
Sa pihak sini, magahatag gihapon ang PRO 18 sang shortlist kay Governor Alfredo Marañon Jr. nga amo ang iya pagapili-an sang mangin bag-o nga provincial director.
Nahibaluan nga si Señoron ang gin-relieve matapos ginhingadlan sang bagman sang Berya Drug Group nga si Ricky Serenio nga nagbaton ini sang P1.2 milyon nga drug payola.
