Kalabanan sa mga kaso sang pagpangluthang indi madakpan ang suspetsado apang sa nagluntad nga shooting incident sa Amerika, ang suspetsado ang isa ka ido nga nagtiro sa iya amo.
Nagresulta sa disgrasya ang dagyang sang isa ka ido sa Memphis, Tennessee sang aksidente sini nga matandog ang armas-luthang nga rason nga naglupok ini kag na-igoan ang nagakatulog sini nga amo.
Suno sa kapulisan, yara sa katre kag nagakatulog ang amo nga lalaki kag ang nobya sini sang naglumpat sa katre ang ido nga si Oreo nga isa ka pit bull.
Apang natapakan kag nasab-it ang kuko sang ido sa gatilyo sang pusil kun sa diin naglupok ini kag naigo sa hita ang iya amo nga gilayon nga gindala sa ospital nga sa karun yara na sa estable nga kondisyon.
Apisar nga madamo sang nagaluntad nga krimen sa US may kaangtanan sa pagpangluthang, tumalagsahon lang matabo nga sapat ang involved diri.
Sang tuig 2023, aksidente nga natirohan sang ido nga German shepherd ang 30 anyos nga lalaki sang matapakan sini ang hunting rifle kag tuig 2018, natirohan naman ang 51 anyos nga lalaki sa Iowa sang iya ido nga pit bull-Labrador mix.
Ang leksyon sa insidente: siguraduhon nga naka-safety ukon maggamit sang trigger lock sa pusil.
