Kadungan sang iya ika-68 nga kaadlawan kahapon, nagalaom si Bacolod City Mayor Evelio “Bing” Leonardia nga madula na ang COVID pandemic.
Sa interview sang Bombo Radyo Bacolod sa alkalde, apisar nga nagasaulog sang kaadlawan, gin-usar sini ang bilog nga adlaw sa pagtrabaho ilabi na karun nga may COVID-19 pandemic.
Suno pa sa alkalde, tatlo ka National Virtual Meeting ang ginpatigayon kahapon kag isa diri amo ang meeting kaupod ang League of Cities in the Philippines kun sa diin sya ang presidente.
Gin-istoryahan sa amo nga meeting ang nahanungod sa Learning Continuity Program sang Department of Education.
Samtang ang Anti-Terrorism Forum naman ang ginpatambungan sini kay City Legal Officer Atty. Joselito Bayatan.
Ang ulihi naman nga meeting ang angot sa Anti-Red Tape nga ginpatambungan sini sa Executive Assistance to the Mayor nga si George Zulueta.
Indi kaangay sadto nga nagapatigayon sang selebrasyon ang alkalde, kahapon nagpabilin nalang ini sa pagtrabaho sa Bacolod Government Center, kag naghatag man sang bulig sa sector sang Home for the Aged kag mga Orphanage bilang pagsaulog sa kaadlawan.
Ang wish naman sini para sa kaadlawan amo ang pagkadula na sang coronavirus disease 2019 (COVID-19) sa kalibutan.
Ginapasalamat naman sang alkalde nga maayo pa ang kahimtangan sang siyudad kun ikumparar sa iban nga mga lugar.
Padayun man nga ginapanugyan sang alkalde nga padayun nga mangin mahalong ang mga pumuluyo kag indi gid pag-iunderestimate ang virus.
Panugyan pa sini nga ang luyag sini nga mabatun nga regalo gikan sa mga pumuluyo amo ang mangin masinulundon kag ang pag-obserbar sang minimum health protocols. Samtang,
Ginalantaw nga magadangat sa anum ang kabug-usan nga kadamuon sang molecular laboratory sa Negros Occidental kag Bacolod City.
Suno kay Bacolod City Mayor Evelio “Bing” Leonardia, wala makahibalo si Dr. Julius Drilon, medical center chief sang Corazon Locsin Montelibano Memorial Hospital nga kadungan sa kaadlawan sang alkalde ang gin-set nga petsa sa pagsugod sang operasyon sang Regional Hospital Bacolod City Biolab sa petsa nga Hulyo 10.
May patigayunon man nga pormal nga inagurasyon subong nga adlaw natuhoy pagbukas sang laboratoryo.
Ginalauman naman ni Leonardia nga mangin maayo ang pagkapyot sang ginpatukod nga laboratoryo kag magamit sa madamo nga testing.
Nagapasalamat man ang alkalde sa Department of Health Regional 6 kag sa Western Visayas Medical Center sa pagbatun sang mga medical specimen sang mga residente sang probinsya sadtong ini palang ang naga-operar nga laboratoryo.
Ginapasalamatan man sang alkalde si Negros Occidental Governor Eugenio Jose “Bong” Lacson, bangod sa pagtugot man sini nga madala sa Teresita Jalandoni Provincial Molecular Laboratory ang mga swab specimen nagikan sa siyudad agud nga mas mapadasig ang paggwa sang resulta.
Ginapasalamatan man ni Leonardia nga may pila ka mga ospital man ang nagpahayag nga magabukas man sang dugang nga mga molecular laboratories.
Una na nga nag-anunsyar ang Doctors Hospital nga magabukas man ini sang molecular laboratory, samtang ang Queen of Mercy Hospital ang magapatigayun sang inagurasyon sa Lunes.
Nagtawag naman ang Regional Director sang RedCross nga si George Lim kay Leonardia kag nagpahibalo nga nag-abot na ang mga equipment kag magasugod na sang operasyon ang molecular laboratory sa katapusan nga semana sang Hulyo.
Nagaplano naman ang Riverside Hospital nga magpatukod man sang biolab.
