BACOLOD CITY – Nahatag na ang allowance sang mga atleta gikan sa ciudad sang Bacolod nga kabahin sang delegado sang Negros Island Region (NIR) sa Palarong Pambansa nga gin-updan pa sang paathag sang Department of Education (DepEd) kasunod sang delay nga natabo.
Kagab-i, nabaton na sang 377 ka mga atleta gikan sa Bacolod ang tag-8 mil pesos nga allowance sang mga ini gikan sa city government.
Nagpaathag si Eden Ariola, Assistant Athletic Manager sang NIR kasunod sang nabalahuba diri kahapon sa Bombo Radyo nga pag reklamo sang mga atleta bangud nga wala sila nakabaton sang allowance.
Suno kay Ariola, DepEd ang may kapaltahan kag indi ang ciudad sang Bacolod tuhoy sa nasambit nga isyu.
Ginklaro sini nga tinalikdan pa nga adlaw sang Huwebes gin release sang accounting office ang 3.5 million pesos nga allowance sang mga Bacoleño nga atleta apang wala ini gilayon nahatag bangud sang kadugay man sang pag proceso sang dokumento sang 377 ka mga atleta.
Dugang pa nga gin athag sini nga bisan ulihi ang allowance sang mga atleta, indi apektado ang pag pakigbahin sang mga ini sa Palaro bangud ang transportasyon, uniform kag pagkaon sang mga ini ang gina sabat na sang DepEd.
Nahibaluan nga sa kabug-usan nga 636 ka mga atleta sang NIR, ang 377 ang nagikan tanan sa Bacolod.
Kadungan sini, nagpasalamat naman ang DepEd sa financial assistance sang Bacolod.
