Pilason ang apat ka persona matapos gin-arado sang awto nga ginamaneho sang 13 anyos nga solterito sa Puentevella Subdivision, Barangay Taculing, Bacolod City.
Sa interview sang Bombo Radyo Bacolod kay Police Captain Dax Santillan, station commander sang Bacolod Police Station 6, nagatambay sa tindahan sa kurbadahan nga dalan ang tatlo ka babayi nga naga-edad 52, 53 kag 63 anyos kasubong man ang lalaki nga 53 anyos sang sila ang hinali lamang nga ginbungguan sang awto kun sa diin ang senior citizen ang nagsuhot pa sa idalom sang salakyan.
Ang apat ang gilayon man nga gindala sa ospital matapos makaangkon sang samad sa nanarisari nga bahin sang lawas.
Ang driver ang natumod nga 13 anyos nga lalaki, nga ginalantaw nagpractice lamang sa pagdrive, apang wala makontrol ang salakyan pagdangat sa likuan.
Gilayon man nga gincontact ang mga ginikanan sini, nga kaangay man nga nakibot bangod sila ang wala nakahibalo nga kabalo na magdrive ang ila bata.
Tinguhaan naman sang amay sang bata nga ma-areglo sa mga biktima kag ini ang nagpasalig nga magasalo sang balayran sa ospital kasubong man magahatag sang kompensasyon sa natuga nga kahalitan.
