Gin-reconvene ni Bacolod City Mayor Greg Gasataya ang African Swine Fever (ASF) Task Force.
Sa interview sang Bombo Radyo Bacolod kay Bacolod City Administrator Atty Mark Steven Mayo, nagpagwa sang Executive Order no 043 series of 2026 si Mayor Greg nga nagareconvene sa ASF Task Force, kun sa diin ang alkalde man ang magapungko nga chairman.
Vice Chairman naman si Bacolod City Veterinarian Dr Maria Agueda Trinidad Dela Torre, upod sa mga city officials, Bacolod City Police Office, Liga ng mga Barangay, City Health Office, City Agriculture’s Office, City Legal Office, City Disaster Risk Reduction and Management Office, Task Force Butagoy, kasubong man ang mga representative sang National Meat Inspection Service kag Highly Urbanized City Agricultural and Fisheries Council.
Ang task force ang magahimo sang contingency plan para sa ASF prevention and control, kalakip na ang information education campaign, investigation kun may suspected cases, pagpatuman sang quarantine kag iban pa nga biosecurity measures.
Ang ila nga information education campaign ang ila na lamang idungan sa house to house vaccination sang City Veterinary Office sa mga backyard hog raisers.
Pabaskugon man ang border control and inspection ilabi na nga may-ara na sang mga local government unit nga may positibo nga kaso sang ASF sa Negros Occidental.
Pahayag sini nga mas nagdamo ang mga entry points sa ciudad sa pagbukas sang Bacolod Negros Occidental Economic Highway (BANOCEH).
Samtang test kits na lamang ang baklon sang ciudad bangod may-ara naman sila sang magamit nga machine.
