Naabtan sang Bacolod Police Station 4 ang babayi nga may feature kaangay sang isa ka Chinese national sa Barangay Estefania, Bacolod City nga nagapangkuha sang picture sang government ID, kag ila ini gin-imbitahan sa ila estasyon.
Sa interview sang Bombo Radyo Bacolod kay Police Captain Francis Depasucat, station commander sang Bacolod Police Station 4, nakabaton sila sang impormasyon nga may nagalibot sa area para magkuha sang picture sang government issued ID kabaylo sang kwarta.
Suno diri, sang ila naabtan ang ginatudlo nga babayi, ila ini gin-imbetahan nga mag-upod sa ila sa estasyon.
Boluntaryo man nga nag-upod ang babayi sakay sa iya mismo nga salakyan.
Suno sa babayi, madugay na ini nga naga-istar sa probinsya kag siyam ka tuig na ini nga nagatinir sa ciudad sang Bacolod.
May yara man ini sang duha ka bata nga mga menor de edad.
Sang ginpamangkot kun ngaa ginakuhaan sini sang picture ang mga ID’s, suno sa babayi, naga-negosyo lamang ini para sa iya business nga Gcash kag siya ang may yara sang negosyo sa isa ka mall sa ciudad.
Bangod nga wala sang may nagpalapit para magcomplain, wala naman gin-detain ang babayi.
