Gintalana nga himuon nga emergency operation center kag regional evacuation site ang Evacuation Centers sang Bacolod City Disaster Risk Reduction and Management Office sa Barangay Taculing kag Vista Alegre hinali liwat maglupok ang Bulkan Kanlaon.
Sa interview sang Bombo Radyo Bacolod kay Bacolod CDRRMO Head Dr. Ma. Laarni Pornan, ang Evacuation Center sa Purok Sunflower, Brgy. Taculing, Bacolod City ang tungaon sa duha kun sa diin ang isa ka bahin ang mangin Emergency Operation Center, nga amo ang dangpan sang mga response clusters.
Samtang ang katunga naman ang gamiton nga evacuation center kun sa diin sila ang sarang makaplastar sang 20 ka modular tents.
Samtang sa Evacuation Center sa Barangay Vista Alegre, 27 ka cubicle naman ang maplastar sa ibabaw kag 15 ka cubicle sa idalom.
Paathag ni Pornan nga ini ang nangin commitment sang Bacolod City sa meeting nga ginpangunahan sang Office of Civil Defense Region 6.
Suno diri, Disyembre pa lamang ini ang ginpreparar na agud magamit sang mga banwa ukon ciudad nga magapatigayon sang evacuation kun maglala ang sitwasyon sang bulkan.
Madumduman nga sa nauna na nga paandam sang OCD 6, magadangat sa 13 ka local government units ang mahalitan inkaso matabo ang Major Volcanic eruption kag magsaka sa Alert Level 4 ang status sang Bulkan Kanlaon.
Una naman nga nagmando si Bacolod City Mayor Alfredo “Albee” Benitez sa pagpreparar sang iban pa nga mahimo ibulig kaangay sang facemask, hygiene kits kag iban pa.
May duha man ka truck ang CDRRMO kag tatlo ka dump truck ang Bacolod City Engineer’s Office nga sarang magamit sa pagdul-ong sang bulig kag sa evacuation efforts.
