Magapatigayon ang Bacolod City government sang survey agud nga matumod ang numero sang mga Bacolodnon nga handa nga magpabakuna batok sa coronavirus.
Ginpaathag man sang pinuno sang Local Inter-Agency Task Force sang Bacolod City nga ginpatigayon ang dry run agud nga mahibaluan ang kalawigon sang pagtinir sang isa ka tawo nga magpakigbahin sa vaccination program sang syudad.
Sa interview sang Bombo Radyo kay Bacolod kay Vice Mayor El Cid Familiaran, lain ang COVID vaccination kun komparar sa iban bangud nagakinahanglan sang pagsuksok sang facemask kag pagsunod sang social distancing.
Ginpahayag man sini nga may yara sang mga ambulansya nga nakabantay sa mga vaccination centers bilang pagpanghanda sa mga ginbakunahan nga mga pumuluyo.
Samtang, ginpahayag man ni Familiaran nga wala sang salabton ang mga tawo nga indi magkadto sa vaccination centers agud nga magpabakuna apisar nga nagpalista ini para magpabakuna.
Maayo man nga tikang ang ginpatigayon nga dry run suno sa bise alkalde bangud diri mahibaluan kun may kakulangan agud nga maplantsa antes mag-abot ang bakuna kag actual nga pagpatigayon sini.
May yara man sang patigayunon nga survey sa mga pumuluyo nga magpabakuna agud mahibaluan ang mga tawo nga willing bakunahan.
Nagpanugyan man ini sa mga pumuluyo nga magpabakuna kag ipabilin ang pagsunod sang proper health protocols apisar nga mangin available na ang bakuna.
