Duha ka ciudad sa probinsya sang Negros Occidental ang mapalaron nga nakabatun sang ‘Walang Gutom Award’ sa kolaborasyon sang Galing Pook Foundation kag Department of Social Welfare and Development (DSWD).
Ang mga nahatagan sang pasidungog amo ang ciudad sang Bago kag Cadiz, samtang ang duha kag iban pa nga local government units ang ginalakipan sang Kidapawan City sa Cotabato kag Mati City sa Davao Oriental.
Sa interview sang Bombo Radyo Bacolod kay Bago City Mayor Nicholas ‘Nico’ Yulo, ang Walang Gutom Award ang ginahatag sa mga local government units kag Non-Government Organizations kun sa diin ang Bago City ang nagdaog paagi sa ‘Food Staple Sufficiency Program’ nga nakabulig agud masolusyunan ang problema sa kagutom.
Gikan sa 101 ka entries, ginpanubo sa 17 tubtob nga napilian ang Top 10 kag didto na ginkuha ang apat ka mga ginpasidunggan nationwide.
Pahanumdom ni Yulo nga ang Bago City ang rice grannary sang Negros Occidental, kun sa diin ang ciudad ang hall of famer naman sa Rice Achiever Award sang Department of Agriculture.
Suno diri, yara sa 200 porsyento ang self sufficiency sa staple food nga bugas sa Bago City, kun sa diin diri gikan ang 20 porsyento nga bugas sa Negros Occidental.
Sila ang nagpartner man sa mga NGOs ukon mga foundation para sa mga programa kaangat sang pagpasanyog sang organic farming.
Samtang sila ang nakig-angot man sa sektor sang kababainhan para sa vegetable farming agud mapromote ang pagtanom sang mga utanon bisan yara lamang as lagwerta sang panimalay.
Pahayag ni Yulo nga ang mga nagdaog ang makabatun sang cash award nga P2 million, kag ini ang ila gamiton para sa pag-expand sang existing nga mga programa ukon pagdihon sang mga bag-o nga mga proyekto.
Plano sini nga pasanyugon pagid ang sektor sang vegetable kag organic farming.
Ang focus sini amo ang makaangkon sang supisyente nga pagkaon kag maaddress ang problema sa kagutom kag malnutrisyon.
Samtang ang mga maayo nga programa ang ginatun-an naman nga mareplicate sa iban nga mga lugar.
