Arestado ang isa ka high value indibidual sa ginpatigayon nga buybust operation sang Talisay City Police Station.
Ginkilala ang nadakpan kay Rubi Taico, nagatrabaho bilang Bantay-Bukid kag residente sang Hacienda Esmeralda, Barangay San Fernando, Talisay City, Negros Occidental.
Sa interview sang Bombo Radyo Bacolod kay Police Lt. Col. Salvador Trono Jr. hepe sang Talisay City Police Station, matapos ang ginpatigayon nga surveillance sa kay Taico, nagpatigayon sila sang drug buybust operation.
Natigayon nga makumpiskar sang mga kapulisan ang 5 grams sang suspected shabu kag ginasuspetsahan nga granada nga ginturn-over naman sang Talisay City Police sa Explosive Ordnance Division sa Negros Occidental Police Provincial Office (NOCPPO) agud nga matsekyar ini.
Ginaimbestigaran pa sa karun ang mga kapulisan kun ngaa may dala nga granada si Taico kag ginavalidate pa kun ini ang affiliated sa makawala nga grupo.
Nakahunong na ang subject person sa Talisay City Police Station kag magapangatubang sang kaso nga naglapas sa RA 9165 ukon Comprehensive Dangerous Drugs Act of 2002 kag paglapas man sa illegal possession of explosives.
